The same procedure as every year – aschia savessen ins tertgar: mintga gada che la locomotiva da vapur dalla VR vegn a Mustér ein ils pumpiers en acziun. Uonn ei quei gia stau la secunda gada il cass.
La pendenza denter Trun e Mustér pretenda dalla locomotiva bia forza. Aschia sgolan era brastgas tras il tgamin e setschentan sin las plauncas schetgas. La sonda, ils 18 d’october 2003, ardentan las brastgas gest en tschun loghens la plaunca denter Punt Stalusa e Mustér. Il tren da stizzar dalla vafier ei en quei mument vid stizzar in emprem fiug denter Rabius e Sumvitg.
10 pumpiers vegnan alarmai igl emprem mument. Mo cu nus vein viu ils differents fiugs eis ei spert stau clar ch’ei drova dapli glieud. En tut ein 19 pumpiers stai en acziun.
La situaziun: Gia sin viadi al plaz da seracass ston ils fiugs vegni parti en prioritads. L’emprema prioritad survegn il fiug a Chischliun che sesanfla mo siat meters naven d’ina casa da habitar.
Cun l’attacca sperta digl auto da pressiun sa quei fiug vegnir stizzaus fetg spert. In sursiglir sin la casa sa vegir impedius era grazia als habitonts che vevan entschiet a stizzar il fiug cun in uder da curtin.
La secunda prioritad survegn il fiug sur Disla. Cheu brischan era caglias e caglioms. Il favugn ualti ferm gida buca gest a stizzar, anzi derasa el il fiug fetg spert. Nus vein saviu impedir che brastgas ein siglidas sin igl uaul da protecziun.
Ina lingia dad aua fuss memia cumplicada en quei liug e da memia gronda lunghezia. Aschia sto l’aua vegnir transportada cugl auto da pressiun sil plaz.
Lu suonda il tierz fiug sut il hotel Disentiserhof. Cheu segida era il persunal dil hotel cun las lavurs da stizzar.
Duront quei temps ha il quart fiug temps avunda da sederasar (maletg su e sut). Las lavurs da stizzar ein per quei motiv pli intensivas cheu. Il tren da stizzar ei denton segidaus cun nus.
Il tschunavel fiug ei puspei a Chischliun, denton eis ei in pign fiug ch’il tren da stizzar dalla Viafier Retica sa sligiar ad uras.
Sche nus mirein anavos vein nus giu cletg: las attaccas da nossa vart a dretg temps han limitau il fiug sin ina hectara. Donns ed accidents ha ei dau negins.
Nus engraziein al persunal dil hotel Disentiserhof sco era als pumpiers dalla VR per il sustegn.
