Suenter plirs meins da lavur ei era il camiun-pionier semtgaus per siu pensum ella Cadi. Il vehichel deriva oriundamein dalla vischnaunca d’Affoltern am Albis (Turitg) ed ei vegnius furnius il zercladur 2009 alla Basa da Pumpiers Sursassiala. Il vehichel dil tip Mercedes 1428 ei ina maschina cun girs automatics e posseda 280 forzas cavagl. En tut peisa el 14 tonnas, actualmein ei sia peisa denton mo 11.4 tonnas, pia dat ei aunc la pusseivladad da cargar rodund 3 tonnas material. Il vehichel sez ei digl onn 1986. Grazia al bien manteniment vesa il vehichel denton ora sco novs. Il camiun-pionier survescha cunzun allas spartas specialas agid stradal ed ustonza d’ieli e chemia. La construcziun oriunda deriva dalla firma Vogt, la firma Rusterholz a Richterswil ha denton modificau il vehichel tenor nos giavischs. Da vart seniasta sesanfla material per la protecziun persunala, naven da vons, egliers tochen al vestgiu da protecziun encunter chemia. Vinavon ha ei cheu material da pionier. Sper ils uaffens usitai dat ei differentas resgias electricas ed a benzin per resgiar lenn e fier, sco era autras materialias. Era ils masts da glisch sco 4 stezzafiugs sesanflan en quei caum. Medemamein ei quella vart dedicada agl agid stradal. Tut ils uaffens pigns ein d’anflar cheu: management da veider, protecziun dad airbags ed organisaziun dil plaz da seracass. Suten sesanfla sablun per ligiar ieli e diesel sin via, mo era sill’aua. Davostier anflan ils uaffens hidraulics plaz: zaunga e forsch, zaunga cumbinada e cilender, suren material per fixar ils vehichels: stabfast e plumatschs d’aria tochen 40 tonnas prestaziun. Da vart dretga schai il coc dil vehichel, in agregat da forza electrica cun ina prestaziun da 25kW e tochen 440 V prestaziun (16 A), aschia che quei tonscha per producir energia per 3 casas d’ina famiglia. Cumbinau cun igl agregat ein gest era ils reflecturs sin tetg cun ina prestaziun totala da 3000 W. In satelit da forza lubescha da metter la centrala 50 m naven dil vehichel. Suten sesanflan diversas sugas d’itschal. Vinavon ei era la chemia da casa, pumpa per pumpar entuorn chemicalias, denton era il material per colligiar cun la tiara. Tut il material da mesiraziun sesanfla cheu: explosimeter, sonda per ladretschs e divers material per analisas chemicas sil plaz. Ei resta aunc entginas specialitads sco ventilatur, pumpa da buglia, ils reflecturs externs per glisch, rollas da cabel e tut ils uaffens che vegnan duvrai sil plaz da seracass. Sin tetg ha ei actualmein 800 meters uders (lingia da transport), ina scala, ina tribuna da salvament per camiuns ed ina suga d’itschal per segirar, resp. trer auters vehichels ord la buglia. Datas tecnicas
Tip: Mercedes Benz 1428 AF
Tracziun: 4×4 cun submissiun
