Tenor ina notizia el cudisch della confraternitat dil Carmel ei 1777 il vitg Curaglia barschaus giu. La tradiziun di che la gronda part dil vitg seigi vegnius intschendraus e zvar la notg dil Venderdis Sogn [28 da mars 1777]. Da vegl figev‘ins la processiun per la sera da mudinas. Duront la processiun hagi negin observau fiug e pér ina persuna ch’eri restada anavos per far ses basegns cu la processiun ei returnada en baselgia, hagi catau adagur ch’ eri pigliau fiug a Curaglia.» Schilunsch la notizia.  Il protocol dil bundstag (dieta) dils 13 da settember 1777 che sesanfla egl archiv dil stat plaida era dil barschament da Curaglia. Il signur Landman Caderas hagi en num dalla vischnaunca da Medel e Curaglia dumandau agid finanzial pils donnegiai. Il fiug hagi intschendrau 32 casas, 28 clavaus e nuegls, 33 talinas e truaischs ed il clutger-baselgia. Sefundond sin quei protocol tila sur Augustin Giger las suandontas conclusiuns en in rapport ella GR nr. 15/1932: «Ins sa pia concluder, ch’il vitg Curaglia fuva cheu vegnius arsentaus quasi entiramein. Quei ei denton fetg tgunsch da capir, essend che Curaglia era en scadin cass sco aunc ozildi baghiau tut a migliac, casas e clavaus, talinas e truaischs e bargias, tut in sper l‘auter, tut in sin l‘auter; ils baghetgs da gliez temps senza excepziun da lenn; cuvretgs cun schlondas e fermai cun lattas e crappa. Ei era pauc aua el vitg, ina suletta fontauna si sur baselgia, in begliatsch dubel de larisch per buentar e lavar resti. Senza maschinas ni instruments de stizzar en cass da basegns e de prighel. Aschia eis ei stau neu e neu tochen 1904.» ord: Val Medel, p. 284 – 293, scret da Linus Beeli